Grunnnám erlendis

Með grunnnámi er átt við byrjunarnám á háskólastigi, þ.e. nám til bachelor gráðu eða diploma gráðu á grunnstigi (diploma próf er yfirleitt eins til tveggja ára nám). Bachelor gráða tekur yfirleitt 3 ár í Evrópu, en fjögur ár í Bandaríkjunum og þrjú til fjögur ár í Kanada. Aðgangskrafan í grunnnám við erlenda háskóla er oftast stúdentspróf, en auk þess getur þurft lágmarkseiningar í einstökum fögum. Þess vegna getur val á námsbraut í framhaldsskóla skipt miklu máli. T.d er algengt að þeir sem ætla í verkfræði, læknisfræði og önnur fög á Norðurlöndum vanti einingar í stærðfræði, raunvísindum, (eðlis, efnafræði, líffræði) og stundum ensku. Einnig er mikilvægt fyrir þá sem hyggjast fara í listnám erlendis, að taka einhver grunnnámskeið í listfögum á framhaldsskólastigi eða önnur listnámskeið.

Mikil ásókn er í háskóla víða um heim og eru t.d. norrænir háskólar meðal þeirra vinsælustu. Þegar nemendur eru valdir úr hópi umsækjenda er yfirleitt farið eftir meðaleinkunn á stúdentsprófi. Því hærri sem hún er, því meiri eru líkurnar á að komast inn. Í Danmörku er einnig tekið tillit til vinnureynslu eð einstakra námskeiða á háskólastigi. Því borgar sig að telja fram allt slíkt sem styrkt getur umsóknina.

Inntökupróf eru einnig algeng inn á háskóla. Yfirleitt er nauðsynlegt að fara til viðkomandi lands til þess að fara í slík próf en þó kemur það fyrir að þau séu haldin hér á landi.

Oft þarf að taka tungumálapróf til þess að komast inn í erlenda háskóla. Inn í þýska og austurríska háskóla þarf nánast skilyrðislaust að taka þýskupróf (ef námið er kennt á þýsku) og ef maður stenst það ekki, þarf oft að byrja á að læra þýsku eina önn t.d. Algengustu tungumálaprófin eru TOEFL (bandarískt enskupróf), IELTS (breskt enskupróf), TestDaf (þýskupróf) og Delf og Dalf frönskuprófin. Það kostar þó nokkuð að taka þessi próf og borgar sig að undirbúa sig vel fyrir þau.

Önnur inntökupróf eru t.d. inn í listaháskóla. Hvort sem hugmyndin er að leggja fyrir sig myndlist, hönnun, arkitektúr, tónlistarnám eða aðra list, þarf yfirleitt alltaf að taka inntökupróf og/eða senda til skólanna verk sín í möppu. Þegar sótt er um í grunnnám til Bandaríkjanna (undergraduate nám) þarf ennfremur oft að taka Sat prófið. Hins vegar fær fólk oft metið eitt ár og jafnvel meira af íslensku stúdentsprófi þegar sótt er um grunnnám í bandaríska háskóla. Ef sótt er strax um sem “transfer” stúdent er hugsanlegt að viðkomandi sleppi við að taka Sat prófið.



Top